ન જાણે કઈ વાતનો બદલો એમણે ગણી ગણી લીધો;
જીવતોને જીવતો એમણે એમના દિલમાં ચણી દીધો.
હજુ ય મારા પ્રેમની થોડી આડ અસર છે એમના પર;
વીસરાયેલ ગીતની માફક તન્હાઈમાં ગણગણી લીધો.
આસપાસ ઊડતો રહેતો હતો હું ય વહેતો વાયરો બની;
એમના ઉષ્માભર્યા શ્વાસોશ્વાસમાં એમણે મને વણી લીધો.
નજર મેળવી એક અદાથી ઝુકાવી નજર એમણે એવી;
ઇતિહાસ આખેઆખો પ્રેમનો એ પળમાં મેં ભણી લીધો.
રાતભર વાવ્યા રાખ્યા સપના સુહાના મેં સહવાસના;
સવારે સવારે કંકુવર્ણો ઉજાગરો આંખોમાં લણી લીધો.
ખુશ ન થા નટવર, તું એમના એ મોઘમ ઇશારા પર;
જતા જતા આખરી વેળાએ જે એમણે તારા ભણી કીધો.
कोई टिप्पणी नहीं:
एक टिप्पणी भेजें